ਨਵੀਂ ਦਿੱਲੀ 23 ਜੁਲਾਈ (ਮਨਪ੍ਰੀਤ ਸਿੰਘ ਖਾਲਸਾ):- ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਦੇ ਸਾਬਕਾ ਹਜ਼ੂਰੀ ਰਾਗੀ ਭਾਈ ਗੁਰਦੇਵ ਸਿੰਘ ਕੋਹਾੜਕਾ ਨੇ ਸਿੱਖ ਨੌਜਵਾਨੀ ਵਿੱਚ ਵਧ ਰਹੇ ਨਸ਼ਿਆਂ ਅਤੇ ਪਤਿਤਪੁਣੇ ਉੱਤੇ ਡੂੰਘੀ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਅੱਜ ਜੇ ਸਾਡੇ ਸ਼ਹੀਦ ਸੂਰਮੇ ਇਸ ਪੀੜ੍ਹੀ ਨੂੰ ਵੇਖਦੇ ਤਾਂ ਸ਼ਾਇਦ ਉਨ੍ਹਾਂ ਦੀਆਂ ਅੱਖਾਂ ਵੀ ਨਮ ਹੋ ਜਾਂਦੀਆਂ। ਜਿਨ੍ਹਾਂ ਨੇ ਗੁਰੂ ਦੀ ਬਖ਼ਸ਼ੀ ਦਸਤਾਰ ਅਤੇ ਕੇਸਾਂ ਦੀ ਰੱਖਿਆ ਲਈ ਆਪਣੇ ਸੀਸ ਕਟਵਾ ਦਿੱਤੇ, ਜਿਨ੍ਹਾਂ ਨੇ ਤੱਤੀਆਂ ਤਵੀਆਂ, ਚਰਖੜੀਆਂ ਅਤੇ ਆਰਿਆਂ ਦੀ ਪੀੜਾ ਸਹਿ ਲਈ ਪਰ ਸਿੱਖੀ ਨਹੀਂ ਛੱਡੀ, ਅੱਜ ਉਸੇ ਕੌਮ ਦੇ ਕੁਝ ਨੌਜਵਾਨ ਚੰਦ ਪਲਾਂ ਦੇ ਨਸ਼ੇ ਅਤੇ ਦਿਖਾਵੇ ਲਈ ਗੁਰੂ ਦੀ ਬਖ਼ਸ਼ੀ ਹੋਈ ਪਹਿਚਾਣ ਤੋਂ ਦੂਰ ਹੋ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪਾਵਨ ਫ਼ੁਰਮਾਨ ਹੈ, “ਜੀਅ ਪ੍ਰਾਨ ਸਭੁ ਤਿਸ ਦਾ ਦਿਤਾ ਜੋ ਹਰਿ ਨਾਮੁ ਧਿਆਏ॥” ਮਨੁੱਖ ਦੀ ਅਸਲ ਤਾਕਤ ਗੁਰੂ ਦੇ ਨਾਮ ਵਿੱਚ ਹੈ, ਨਾ ਕਿ ਉਨ੍ਹਾਂ ਚੀਜ਼ਾਂ ਵਿੱਚ ਜੋ ਉਸ ਦੀ ਦੇਹ, ਮਨ ਅਤੇ ਆਤਮਾ ਨੂੰ ਕਮਜ਼ੋਰ ਕਰ ਦੇਣ। ਭਾਈ ਕੋਹਾੜਕਾ ਨੇ ਕਿਹਾ ਕਿ ਜਦੋਂ ਇੱਕ ਸਿੱਖ ਆਪਣੇ ਕੇਸ ਕਟਾਉਂਦਾ ਹੈ ਤਾਂ ਸਿਰਫ਼ ਵਾਲ ਨਹੀਂ ਡਿੱਗਦੇ, ਸਗੋਂ ਸਦੀਆਂ ਦੀ ਕੁਰਬਾਨੀ ਦਾ ਇੱਕ ਅਹਿਸਾਸ ਵੀ ਜ਼ਖ਼ਮੀ ਹੁੰਦਾ ਹੈ। ਜਦੋਂ ਇੱਕ ਨੌਜਵਾਨ ਨਸ਼ੇ ਦੀ ਸੂਈ ਜਾਂ ਗੋਲੀ ਨੂੰ ਆਪਣਾ ਸਹਾਰਾ ਬਣਾ ਲੈਂਦਾ ਹੈ ਤਾਂ ਸਿਰਫ਼ ਉਸ ਦੀ ਜ਼ਿੰਦਗੀ ਨਹੀਂ, ਉਸ ਦੇ ਮਾਪਿਆਂ ਦੇ ਸੁਪਨੇ, ਪਰਿਵਾਰ ਦੀਆਂ ਉਮੀਦਾਂ ਅਤੇ ਕੌਮ ਦਾ ਭਵਿੱਖ ਵੀ ਟੁੱਟਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਮਾਂ ਨੇ ਆਪਣੇ ਪੁੱਤਰ ਦੇ ਸਿਰ ‘ਤੇ ਦਸਤਾਰ ਦਾ ਸੁਪਨਾ ਵੇਖਿਆ ਹੋਵੇ, ਉਸ ਲਈ ਉਸ ਨੂੰ ਨਸ਼ਿਆਂ ਜਾਂ ਆਪਣੀ ਪਹਿਚਾਣ ਤੋਂ ਦੂਰ ਜਾਂਦਾ ਵੇਖਣਾ ਕਿਸੇ ਜੀਉਂਦੇ ਸੋਗ ਤੋਂ ਘੱਟ ਨਹੀਂ। ਇਹ ਉਹ ਦਰਦ ਹੈ ਜਿਸ ਨੂੰ ਸ਼ਬਦਾਂ ਵਿੱਚ ਬਿਆਨ ਕਰਨਾ ਔਖਾ ਹੈ। ਉਨ੍ਹਾਂ ਨੌਜਵਾਨਾਂ ਨੂੰ ਹੱਥ ਜੋੜ ਕੇ ਅਪੀਲ ਕੀਤੀ ਕਿ ਇਕ ਵਾਰ ਆਪਣੇ ਘਰ ਵਿੱਚ ਲੱਗੀਆਂ ਗੁਰੂ ਸਾਹਿਬਾਨ ਅਤੇ ਸ਼ਹੀਦਾਂ ਦੀਆਂ ਤਸਵੀਰਾਂ ਵੱਲ ਦੇਖੋ ਅਤੇ ਆਪਣੇ ਆਪ ਤੋਂ ਪੁੱਛੋ ਕਿ ਕੀ ਉਨ੍ਹਾਂ ਨੇ ਇਹ ਦਿਨ ਵੇਖਣ ਲਈ ਕੁਰਬਾਨੀਆਂ ਦਿੱਤੀਆਂ ਸਨ? ਅਜੇ ਵੀ ਸਮਾਂ ਹੈ। ਨਸ਼ਿਆਂ ਨੂੰ ਛੱਡੋ, ਪਤਿਤਪੁਣੇ ਤੋਂ ਤੋਬਾ ਕਰੋ, ਗੁਰੂ ਦੇ ਚਰਨਾਂ ਵਿੱਚ ਵਾਪਸ ਆਓ, ਕਿਉਂਕਿ ਗੁਰੂ ਦਾ ਦਰ ਹਰ ਮੁੜ ਆਉਣ ਵਾਲੇ ਲਈ ਖੁੱਲ੍ਹਾ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਦਿਨ ਸਾਡੀ ਨੌਜਵਾਨੀ ਮੁੜ ਨਾਮ ਬਾਣੀ, ਦਸਤਾਰ, ਕੇਸ ਅਤੇ ਗੁਰਮਤਿ ਨਾਲ ਜੁੜ ਜਾਵੇਗੀ, ਉਸ ਦਿਨ ਸ਼ਹੀਦਾਂ ਦੀਆਂ ਰੂਹਾਂ ਨੂੰ ਵੀ ਅਸਲ ਸ਼ਰਧਾਂਜਲੀ ਮਿਲੇਗੀ ਅਤੇ ਸਿੱਖ ਕੌਮ ਦਾ ਭਵਿੱਖ ਵੀ ਸੁਰੱਖਿਅਤ ਹੋਵੇਗਾ।
Author: khireyapunjab
ਸ੍ਰ. ਸੰਤੋਖ ਸਿੰਘ ਪ੍ਰੇਮੀ (ਐਡੀਟਰ ਖਿੜਿਆ ਪੰਜਾਬ) ਸਤਿਕਾਰਯੋਗ ਪਿਤਾ ਜੀ ਨੇ ਸਭ ਤੋਂ ਪਹਿਲਾ ਪੇਪਰ 1969 ਵਿੱਚ ਬਾਜ਼ਾਰ ਕਾਠੀਆਂ ਅੰਮ੍ਰਿਤਸਰ ਤੋਂ ਸ਼ੁਰੂ ਕੀਤਾ ਸੀ । ਉਸ ਤੋਂ ਬਾਅਦ ਕੁੱਝ ਸਮਾਂ ਖਿੜਿਆ ਪੰਜਾਬ ਹਫਤਾਵਾਰੀ ਖਾਲੜਾ ਮੰਡੀ ਤੋਂ ਵੀ ਪ੍ਰਕਾਸ਼ਿਤ ਕੀਤਾ ਜਾਂਦਾ ਰਿਹਾ । ਪਿਤਾ ਜੀ ਨੇ ਇਹ ਮਹੀਨਾਵਾਰੀ ਪੇਪਰ ਸ੍ਰ. ਲਛਮਣ ਸਿੰਘ ਗਿੱਲ (ਮਰਹੂਮ ਮੁੱਖ ਮੰਤਰੀ ਪੰਜਾਬ) ਦੀ ਯਾਦ ਵਿੱਚ ਸ਼ੁਰੂ ਕੀਤਾ ਸੀ ਕਿਉਂ ਕਿ ਉਹ ਗਿੱਲ ਜੀ ਨਾਲ ਪਰਸਨਲ ਪੀ. ਏ. ਦੇ ਤੌਰ ਤੇ ਵਿਚਰੇ ਸਨ । ਅਸੀ ਪਿਛਲੇ ਸਮੇਂ ਤੋਂ ਖਿੜਿਆ ਪੰਜਾਬ ਯੂ ਟਿਊਬ ਚੈਨਲ ਚਲਾ ਰਹੇ ਸੀ । ਹੁਣ ਪਿਤਾ ਜੀ ਵਲੋਂ ਸ਼ੁਰੂ ਕੀਤਾ ਨਿਊਜ਼ ਪੇਪਰ ਪੰਜਾਬੀ ਆਨਲਾਈਨ ਚਾਲੂ ਕੀਤਾ ਗਿਆ ਹੈ । ਅਕਾਲ ਪੁਰਖ ਸਹਾਈ ਹੋਵੇ ਪੰਜਾਬ ਅਤੇ ਪੰਜਾਬੀਅਤ ਦੀ ਸੇਵਾ ਕਰਨ ਦਾ ਬੱਲ ਬਖਸ਼ੇ ।
