👉 ਸੰਗਤ ਨੂੰ ਚਿੰਤਨ ਦੇਣ ਵਾਲੀ ਅਗਵਾਈ ਦੀ ਲੋੜ, ਤਾਲੀਆਂ ਇਕੱਠੀਆਂ ਕਰਨ ਵਾਲੀ ਨਹੀਂ
ਨਵੀਂ ਦਿੱਲੀ 9 ਜੂਨ (ਮਨਪ੍ਰੀਤ ਸਿੰਘ ਖਾਲਸਾ):- ਸਿੱਖ ਪੰਥ ਦੀਆਂ ਸਟੇਜਾਂ ਕਦੇ ਗੁਰਪੁਰਬਾਂ ਅਤੇ ਵੱਖ ਵੱਖ ਮੌਕਿਆ ਉਪਰ ਬੌਧਿਕ ਅਗਵਾਈ ਦਾ ਦਰਪਣ ਹੁੰਦੀਆਂ ਸਨ। ਉੱਥੇ ਉਹ ਸ਼ਖਸੀਅਤਾਂ ਬੈਠਦੀਆਂ ਸਨ ਜਿਨ੍ਹਾਂ ਨੇ ਗੁਰਬਾਣੀ ਨੂੰ ਪੜ੍ਹਿਆ, ਇਤਿਹਾਸ ਨੂੰ ਸਮਝਿਆ ਅਤੇ ਕੌਮ ਦੇ ਦੁੱਖ-ਸੁੱਖ ਨੂੰ ਆਪਣੇ ਅੰਦਰ ਮਹਿਸੂਸ ਕੀਤਾ ਸੀ। ਉਹ ਸੰਗਤਾਂ ਨੂੰ ਸਿਰਫ਼ ਜੋਸ਼ ਨਹੀਂ ਦਿੰਦੇ ਸਨ, ਸਗੋਂ ਸੋਚਣ ਦੀ ਦਿਸ਼ਾ ਵੀ ਦਿੰਦੇ ਸਨ। ਇੰਨ੍ਹਾ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਦਿੱਲੀ ਕਮੇਟੀ ਚੋਣਾਂ ਲਈ ਵਾਰਡ ਨੰਬਰ 32 ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਉਮੀਦਵਾਰ ਸ. ਸੰਤ ਮੀਤ ਸਿੰਘ ਨੇ ਕਿਹਾ ਅੱਜ ਦੁੱਖ ਦੀ ਗੱਲ ਹੈ ਕਿ ਬਹੁਤੀਆਂ ਸਟੇਜਾਂ ਉੱਤੇ ਵਿਚਾਰ ਦੀ ਥਾਂ ਵਾਹ-ਵਾਹ, ਸੱਚ ਦੀ ਥਾਂ ਲੋਕਪ੍ਰਿਯਤਾ ਅਤੇ ਪੰਥਕ ਚਿੰਤਨ ਦੀ ਥਾਂ ਨਾਅਰੇਬਾਜ਼ੀ ਨੇ ਲੈ ਲਈ ਹੈ। ਜਦੋਂ ਸਟੇਜਾਂ ਤੋਂ ਵਿਚਾਰਕ ਗਾਇਬ ਹੋ ਜਾਂਦੇ ਹਨ ਤਾਂ ਕੌਮ ਦੇ ਫੈਸਲੇ ਵੀ ਭਾਵਨਾਵਾਂ ਦੇ ਹਵਾਲੇ ਹੋ ਜਾਂਦੇ ਹਨ। ਓਨ੍ਹਾ ਕਿਹਾ ਅੱਜ ਲੀਡਰਸ਼ਿਪ ਨੂੰ ਆਪਣੇ ਆਪ ਤੋਂ ਇਹ ਸਵਾਲ ਪੁੱਛਣ ਦੀ ਲੋੜ ਹੈ ਕਿ ਅਸੀਂ ਸੰਗਤ ਨੂੰ ਕੀ ਦੇ ਰਹੇ ਹਾਂ, ਚਿੰਤਨ ਜਾਂ ਚਰਚਾ ਤੋਂ ਭੱਜਣ ਦੀ ਆਦਤ..? ਗੁਰੂ ਸਾਹਿਬਾਨ ਨੇ ਸਿੱਖ ਨੂੰ ਸੋਚਣ ਵਾਲਾ, ਸਵਾਲ ਕਰਨ ਵਾਲਾ ਅਤੇ ਸੱਚ ਨੂੰ ਪਰਖਣ ਵਾਲਾ ਬਣਾਇਆ ਸੀ। ਜੇ ਸਾਡੀਆਂ ਸਟੇਜਾਂ ਸਿਰਫ਼ ਵਿਅਕਤੀ-ਪੂਜਾ ਅਤੇ ਤਾਲੀਆਂ ਇਕੱਠੀਆਂ ਕਰਨ ਦਾ ਸਾਧਨ ਬਣ ਜਾਣ, ਤਾਂ ਇਹ ਪੰਥ ਦੀ ਤਾਕਤ ਨਹੀਂ, ਕਮਜ਼ੋਰੀ ਦੀ ਨਿਸ਼ਾਨੀ ਹੈ। ਕੌਮਾਂ ਨਾਅਰਿਆਂ ਨਾਲ ਨਹੀਂ, ਸਿਧਾਂਤਾਂ, ਗਿਆਨ ਅਤੇ ਦੂਰਅੰਦੇਸ਼ੀ ਨਾਲ ਅੱਗੇ ਵਧਦੀਆਂ ਹਨ। ਅੰਤ ਵਿਚ ਸ. ਸੰਤ ਮੀਤ ਸਿੰਘ ਨੇ ਕਿਹਾ ਸਮੇਂ ਦੀ ਮੰਗ ਹੈ ਕਿ ਗੁਰਪੁਰਬਾਂ ਦੀਆਂ ਸਟੇਜਾਂ ਮੁੜ ਗੁਰਮਤਿ ਅਧਾਰਿਤ ਵਿਚਾਰ-ਵਟਾਂਦਰੇ, ਇਤਿਹਾਸਕ ਸੂਝ ਅਤੇ ਕੌਮੀ ਮਸਲਿਆਂ ਦੇ ਗੰਭੀਰ ਮਨਨ ਦਾ ਕੇਂਦਰ ਬਣਨ। ਸੰਗਤ ਨੂੰ ਅਜਿਹੀ ਅਗਵਾਈ ਚਾਹੀਦੀ ਹੈ ਜੋ ਦਿਲਾਂ ਨੂੰ ਗਰਮ ਕਰਨ ਦੇ ਨਾਲ-ਨਾਲ ਦਿਮਾਗਾਂ ਨੂੰ ਵੀ ਰੌਸ਼ਨ ਕਰੇ। ਜੇ ਅਸੀਂ ਆਪਣੀਆਂ ਸਟੇਜਾਂ ਉੱਤੇ ਮੁੜ ਬੁੱਧੀਜੀਵੀਆਂ, ਵਿਦਵਾਨਾਂ ਅਤੇ ਨਿਰਭਉ ਸੱਚ ਬੋਲਣ ਵਾਲਿਆਂ ਨੂੰ ਜਗ੍ਹਾ ਦੇਵਾਂਗੇ, ਤਾਂ ਪੰਥ ਨੂੰ ਜੋਸ਼ ਦੇ ਨਾਲ ਹੋਸ਼ ਵੀ ਮਿਲੇਗਾ, ਅਤੇ ਇਹੀ ਕੌਮ ਦੀ ਅਸਲ ਤਰੱਕੀ ਦਾ ਰਾਹ ਹੈ।
Author: khireyapunjab
ਸ੍ਰ. ਸੰਤੋਖ ਸਿੰਘ ਪ੍ਰੇਮੀ (ਐਡੀਟਰ ਖਿੜਿਆ ਪੰਜਾਬ) ਸਤਿਕਾਰਯੋਗ ਪਿਤਾ ਜੀ ਨੇ ਸਭ ਤੋਂ ਪਹਿਲਾ ਪੇਪਰ 1969 ਵਿੱਚ ਬਾਜ਼ਾਰ ਕਾਠੀਆਂ ਅੰਮ੍ਰਿਤਸਰ ਤੋਂ ਸ਼ੁਰੂ ਕੀਤਾ ਸੀ । ਉਸ ਤੋਂ ਬਾਅਦ ਕੁੱਝ ਸਮਾਂ ਖਿੜਿਆ ਪੰਜਾਬ ਹਫਤਾਵਾਰੀ ਖਾਲੜਾ ਮੰਡੀ ਤੋਂ ਵੀ ਪ੍ਰਕਾਸ਼ਿਤ ਕੀਤਾ ਜਾਂਦਾ ਰਿਹਾ । ਪਿਤਾ ਜੀ ਨੇ ਇਹ ਮਹੀਨਾਵਾਰੀ ਪੇਪਰ ਸ੍ਰ. ਲਛਮਣ ਸਿੰਘ ਗਿੱਲ (ਮਰਹੂਮ ਮੁੱਖ ਮੰਤਰੀ ਪੰਜਾਬ) ਦੀ ਯਾਦ ਵਿੱਚ ਸ਼ੁਰੂ ਕੀਤਾ ਸੀ ਕਿਉਂ ਕਿ ਉਹ ਗਿੱਲ ਜੀ ਨਾਲ ਪਰਸਨਲ ਪੀ. ਏ. ਦੇ ਤੌਰ ਤੇ ਵਿਚਰੇ ਸਨ । ਅਸੀ ਪਿਛਲੇ ਸਮੇਂ ਤੋਂ ਖਿੜਿਆ ਪੰਜਾਬ ਯੂ ਟਿਊਬ ਚੈਨਲ ਚਲਾ ਰਹੇ ਸੀ । ਹੁਣ ਪਿਤਾ ਜੀ ਵਲੋਂ ਸ਼ੁਰੂ ਕੀਤਾ ਨਿਊਜ਼ ਪੇਪਰ ਪੰਜਾਬੀ ਆਨਲਾਈਨ ਚਾਲੂ ਕੀਤਾ ਗਿਆ ਹੈ । ਅਕਾਲ ਪੁਰਖ ਸਹਾਈ ਹੋਵੇ ਪੰਜਾਬ ਅਤੇ ਪੰਜਾਬੀਅਤ ਦੀ ਸੇਵਾ ਕਰਨ ਦਾ ਬੱਲ ਬਖਸ਼ੇ ।
